जापान — जापानका पहाडी क्षेत्रहरूमा हाल भालुको त्रास चरम स्तरमा पुगेको छ। भालु नियन्त्रणका लागि धेरै क्षेत्रमा आत्मरक्षा बल (एसडीएफ) तैनाथ गरिएको जापानी अधिकारीहरूले पुष्टि गरेका छन्।
अप्रिलदेखि देशभर १०० भन्दा बढी स्थानमा भालुको आक्रमण भएको छ, जसमा १२ जनाको मृत्यु भएको अन्तर्राष्ट्रिय सञ्चार माध्यमले जनाएका छन्।
सबैभन्दा धेरै मृत्यु अकिता प्रिफेक्चर र छिमेकी इवाते क्षेत्रमा भएका छन्। यो वर्ष अकितामा भालु देखिने संख्या ६ गुणा बढेर ८,००० भन्दा बढी पुगेको छ।
स्थिति गम्भीर बन्दै जाँदा, प्रिफेक्चरल गभर्नरले सेनाको सहयोग मागेका थिए।
बुधबार एसडीएफका सैनिकहरू काजुनो शहरमा पुगेका छन्, जहाँ उनीहरूले
स्टीलको पासो लगाउने,
स्थानीय अधिकारीलाई निर्देशन र सहयोग,
जोखिमयुक्त स्थान पहिचान
जस्ता काम गरिरहेका छन्।
प्रशिक्षित भालु शिकारीहरूलाई पनि सक्रिय बनाइएको छ।
अधिकारीहरूले स्थानीय बासिन्दालाई—
घर बाहिर घण्टी राख्न,
रातमा बाहिर ननिस्किन,
जंगलतिर नजान,
ठूलो आवाज निकालेर भालु तर्साउन,
जस्ता सावधानी अपनाउन आग्रह गरेका छन्।
काजुनोका ३० हजार बासिन्दाहरू अहिले खुला ठाउँमा हिँडडुल गर्न डराइरहेका छन्।
स्थानीयले भन्छन्—
“पहिले भालु शहरनजिक आउँदैनथे, अहिले त मानिसतिरै धुख्कसँग आउँछन्।”
भालुको भयका कारण धेरै सार्वजनिक कार्यक्रमहरू स्थगित गरिएका छन्। सेना नोभेम्बरको अन्त्यसम्म काजुनो, ओडाटे र किताकिता शहरमा तैनाथ हुनेछ।
भालुको गतिविधि अहिले—
सुपरमार्केट,
रिसोर्ट नजिक,
बस स्टप,
विद्यालय परिसर
सम्म फैलिएको छ।
केही विद्यालय अस्थायी रूपमा बन्द गरिएका छन्।
जापानको वातावरण मन्त्रालयका अनुसार—
जलवायु परिवर्तन,
वन आवरण घट्दै जानु,
जंगली क्षेत्रमा खानाको कमी
कारणले भालुहरू मानव बस्तीमा सर्न थालेका हुन्।
भालुहरू अक्टोबर–नोभेम्बरमा शीतनिद्रा अघि बढी खाना खोज्न सक्रिय हुने भएकाले यो समयमा आक्रमण बढ्ने वैज्ञानिकहरूको निष्कर्ष छ।
यसैबीच, सरकारले भालु मार्ने नियम खुकुलो बनाएको छ, ताकि तात्कालिक खतरा भएपछि कारबाही सहज होस्।
जापानमा दुई प्रमुख भालु प्रजाति पाइन्छन्—
एसियाली कालो भालु (तौल १३० किलोग्रामसम्म)
होक्काइडो भालु (तौल ४०० किलोग्रामसम्म)
जापानले यसअघि पनि मृग र सील नियन्त्रण गर्न सैन्य तैनाथी गरेको इतिहास छ।
